نبذة عن الكتاب
يأتي الكتاب باللهجة العامية المصرية لأنه بيقدم روشتة "واقعية" للتعافي من العلاقات المؤذية، وبالتبعية أعددتُ لك عزيزي القارئ هذا التعريف للكتاب باللهجة العامية المصرية، وده مقصود لأن الكتاب فعلًا واقعي لدرجة تصدمك مع كل سطر فيه لانك هتشوف بعينك مع كل سطر علاقة مريت بيها بنفسك أو مر بيها حد من اللي حواليك، وده اللي خلى الكاتب ينوِّه بيه في بداية كتابه باعتباره مش كتاب نظري عن العلاقات ولكنه كتاب جمع فيه خلاصة تجاربه على مدار سنين من حياته وحياة ناس كتير ومن أوجاعهم في العلاقات وتحويل هذه الأوجاع إلى دروس مستفادة توعيك وتساعدك في إعادة رسم حدود حياتك.
رؤية الكاتب ومنهج الكتاب
يتلخص منهج الكتاب في البساطة والواقعية وتقدر تقول إنه روشتة علاج
بالصدمة من العلاقات المؤذية والسامة الموجودة في حياتنا.
استعراض فصول الكتاب
بعد إهداء رقيق وتنويه صريح، يبدأ الكتاب بمقدمة يوضح فيها
الكاتب أهمية وضع الحدود في العلاقات الاجتماعية باعتبارها أسوارًا تحمي سلامك النفسي
الداخلي وإن معظم مشاكلنا الاجتماعية ناتجة عن غياب تلك الحدود لكن رسم تلك الحدود
حرفة والأحرف هو إنك تحافظ عليها وتحميها، لينطلق بعد هذه المقدمة الكتاب في تسليط
الضوء على بعض هذه العلاقات المؤذية على هيئة فصول منفصلة متصلة يبدأ كل فصل منها
بعرض شكل العلاقة وتوصيفها ومشاكلها وفي ختام سطور كل فصل روشتة سريعة للتعافي من
كل علاقة.
سطور من الكتاب
"علاقتنا باللي حوالينا عاملة زي الحبال.. من أول علاقتنا
بربنا اللي بتمثل حبل النجاة والسعادة وإن المتمسك بحبل الله المتين هو من
الفائزين: "وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا..."..
والحبل السري اللي كان بيربطك بأمك قبل ولادتك، ولكن زي ما فيه حبال بتحمينا وتقوينا
وتنجينا وقت اللزوم، فيه حبال تانية بتمثل لنا الأذى والألم والغش والهلاك: فيه
علاقة في شكل حبل يتلف حوالين رقبتك ويخنقك، وفيه علاقة على شكل حبل يكتفك ويشل
حركتك وتحس إنك عاجز ضعيف قليل الحيلة ولا أنت عارف تخرج براها ولا قادر تتحمل
تكتيفتك دي ولا فيه حد بيساعدك تفكها، وفيه علاقة على شكل حبل دايب شكله حلو صحيح
ويشد العين لكن دايب والمتعلق بيه خسران، وعندك علاقة تانية على شكل حبل دوَّار
بيطوّحك يمين وشمال سما وأرض، علاقة تدوّخك، ولا أنت راسي فيها على بر ولا حاسس فيها
بأي طمأنينة أو أمان؛ خذلان واعتذارات ووعود متغلفة بمواقف تكسف وتوجع، حاجة كدة
مش مخلياك لا عارف تاخد قرار بالهروب ولا أنت قادر تبعد.. الخلاصة: ركز كويس وفتح
عينيك وأنت بتمسك في حبل أي علاقة جديدة، ظبّط مسافاتك وارسم حدودك بوضوح، اتأكد من
متانة الحبل وقدرته على الصمود وتحمل المسؤولية، بلاش تغرك المظاهر والألوان
البراقة.. اختار الحبل الصح والمناسب اللي يوصلك لبر الأمان"
بطاقة التعريف بالكتاب
عنوان الكتاب: الزم حدودك
الكاتب: علي موسى
عدد الصفحات: 223 صفحة
دار النشر: أدباء 2000 للنشر والتوزيع
تاريخ النشر: 2019
ليست هناك تعليقات:
إرسال تعليق